పెళ్లి బాగోతాన్ని బయటపెట్టిన ఫేస్‌బుక్: మహిళ ఫిర్యాదు

గుర్గావ్: ఓ యువతికి ప్రముఖ మాట్రిమోనియల్ ద్వారా పరిచయమైన వ్యక్తి.. ఆమెను వివాహమాడతానని ప్రతిపాదన చేశాడు. అందుకు ఆమె కూడా అంగీకరించింది. దీంతో వారిద్దరూ వివాహం చేసుకున్నారు. ఏడాది తర్వాత ఆమె ఫేస్‌బుక్‌లో తన భర్త ప్రొఫైల్‌ను చూసింది. ఒక్కసారిగా ఆశ్చర్యానికి గురైంది. ఎందుకంటే.. అప్పటికే ఆమె వివాహం చేసుకున్న వ్యక్తికి వివాహమైంది. ఓ కూతురు కూడా ఉంది.

దీంతో ఆమె పోలీసులను ఆశ్రయించింది. కేసు నమోదు చేసుకున్న పోలీసులు, గురువారం అతడ్ని అరెస్ట్ చేశారు. వివరాల్లోకి వెళితే.. ఉత్తరప్రదేశ్ రాష్ట్రంలోని ఘజియాబాద్‌లో ఓ సంస్థకు డైరెక్టర్‌గా పని చేస్తున్నాడు నిందితుడైన ప్రణవ్ ముఖర్జీ(46).

ఓ పాఠశాలలో టీచర్‌గా పనిచేస్తున్న బాధిత యువతి(35)ని మాట్రిమోనియల్ సైట్‌లో చూసి నచ్చవంటూ రిక్వస్ట్ పెట్టాడు. తర్వాత రెండు నెలలపాటు ఇద్దరూ చాటింగ్ చేసుకున్నారు. ఆ తర్వాత రిజిస్టర్ వివాహం చేసుకుని మహారాష్ట్రలోని పుణెకు వెళ్లిపోయారు. 2014లో గుర్గావ్‌కు తమ కాపురాన్ని మర్చారు.

కాగా, ఇటీవల బాధిత మహిళ ఫేస్‌బుక్‌లో తన భర్త ప్రణవ్ ముఖర్జీ ప్రొఫైల్‌ను చూసింది. తన భర్తకు అప్పటికే వివాహమైందని, ఓ కూతురు కూడా ఉందని తెలిసింది. దీంతో షాక్ గురైన బాధితురాలు తన తల్లిదండ్రులకు విషయం చెప్పి, పోలీసులను ఆశ్రయించింది. కేసు నమోదు చేసుకున్న పోలీసులు, నిందితుడ్ని అరెస్ట్ చేశారు.