అబార్షన్ కోసం యత్నం: ఆ స్టార్‌ను వద్దనుకున్న తల్లి

లండన్: పోర్చుగల్ ఫుట్‌బాల్ ఆటగాడు క్రిస్టియానో రొనాల్డో... ఎంతో గట్టిపిండమని, ఆ పిల్లాడిని వద్దని భావించానని అతని తల్లి డొలొరెస్ అవియేరో చెప్పారు.. పోర్చుగల్‌లో శుక్రవారం అవియేరో ఆటో బయోగ్రఫీ మై కోరజమ్ (మదర్ కరేజ్)ను విడుదల చేశారు. ఈ సందర్భంగా మాట్లాడారు.

తన కడుపులో పెరుగుతున్న బిడ్డను వద్దనుకున్నానని, కానీ భ్రూణహత్యకు వైద్యులు అంగీకరించలేదని వెల్లడించారు. తాను వద్దనుకున్న బిడ్డే సాకర్ రంగంలో ప్రపంచ ప్రఖ్యాని ఆర్జిస్తాడని అనుకోలేదని ఆమె ఆ పుస్తకంలో పేర్కొంది. అబార్షన్‌కు వైద్యులు సుముఖత వ్యక్తం చేయలేదని, దీనితో వేడి బీరు తాగి, కుప్పకూలి పడే వరకూ పరుగు తీశానని తెలిపారు.

అయితే, తాను కోరుకున్నట్టు అబార్షన్ జరగలేదని, లేకపోతే ఇప్పుడు రొనాల్డో ఉండేవాడే కాదని వ్యాఖ్యానించింది. ఈ విషయం రొనాల్డోకు కూడా తెలుసునని ఆమె తన ఆత్మ కథలో తెలిపారు. నువ్వు నన్ను వద్దనుకున్నావు.. ఇప్పుడు ఇంటికి నేనే ఆధారమయ్యాను.. అని రొనాల్డో అన్నాడని అవెరో తెలిపారు. అతని ఎదుగుదలను చూసి తల్లిగా తాను ఎంతో గర్విస్తున్నానని పేర్కొన్నారు.