షాజహానా కవిత చమ్కీ

కలల కుచ్చుముడి వీడి
దారాలు దారాలుగా జీవితం
నాలుగ్గోడలకు రోజులను బిగించి
పట్టి పట్టి చేస్తున్న కలల కార్చోప్

రాత్రి చిక్కటి చీకటి మీద
మెరుపులుగా మెరుస్తున్న
కట్ దానా కుందన్‌లను
ఆలోచనల జరీతో కలబోసి చేస్తున్న కార్చోఫ్

సాదా చమ్కీ ... దేవదాసి చమ్కీ..
రకరకాల రంగుల మెరుపు కలలు

సాదా జీవితానికి
అరబ్ దీనార్ల రంగుల కలలు
రాకుమారుడి రాక కోసం
ఆకాశం తానులో నేసిన నక్షత్రాల స్వాగతం

అన్ని చమ్కీలు చీర మీదకు చేరవు
దారి తప్పి కింద పడి - ఊడ్పలో మాసి -
బజారులో ఎండకు మెరసి -
ఏ గాలి వేగానికో
బురద గుంటల్లో ఆత్మహత్య చేసుకుంటాయి

బతుకు చీరకు వేసిన కట్‌దానాలానో
బజారున పడ్డ చమ్కీలానో
ఏ ఎగుమతిలో ఎక్కడి దాకా వెళ్తుందో తెలియదు
ఏ బురద గుంట వడిలో మునుగుతుందో తెలియదు
కానీ మెరవడం దాని జీవలక్షణం
పాత బస్తీ నిండా మెరుస్తున్న చమ్కీలే