సానియాపై అంబాసిడర్: మళ్లీ బిజెపి ఎమ్యెల్యే వ్యాఖ్య

హైదరాబాద్: తెలంగాణ బ్రాండ్ అంబాసిడర్‌గా టెన్నిస్ స్టార్ సానియా మీర్జా నియామకాన్ని తప్పు పడుతూ బిజెపి నాయకుడు డాక్టర్ లక్ష్మణ్ చేసిన వ్యాఖ్యలతో జాతీయ నాయకులు విభేదించినప్పటికీ ఆ పార్టీ నాయకులు వ్యతిరేక వ్యాఖ్యలు మానడం లేదు.

తెలంగాణ ముఖ్యమంత్రి కె. చంద్రశేఖర రావు ఏం ఆశించి సానియా మిర్జాను బ్రాండ్ అంబాసిడర్‌గా ఎంపిక చేశారని బిజెపి శాసనసభ్యుడు ప్రభాకర్ ప్రశ్నించారు. బ్రాండ్ అంబాసిడర్‌గా ఎంపిక చేసే విషయంలో విధివిధానాలను బయట పెట్టాలని ఆయన శుక్రవారం మీడియా సమావేశంలో డిమాండ్ చేశారు.

తెలంగాణ ప్రభుత్వం ప్రజల సంక్షేమాన్ని పట్టించుకోవడంలేదని ఆయన ఆరోపించారు. రాష్ట్రంలో అన్ని రంగాల్లో అభివృద్ధి కుంటుపడిందని ఆగ్రహం వ్యక్తం చేశారు. ఇప్పటికైనా ప్రజాసంక్షేమంపై దృష్టిసారించాలని ఎమ్మెల్యే ప్రభాకర్ సూచించారు.

తెలంగాణ బిజెపి నేత డాక్టర్ కె. లక్ష్మణ్ చేసిన వ్యాఖ్యలను బిజెపి జాతీయ నేత ప్రకాష్ జవదేకర్ తోసిపుచ్చారు. పార్టీ వైఖరిని స్పష్టం చేశారు. సానియా మీర్జా భారతదేశానికి గర్వకారణమని అన్నారు. సానియా మీర్జా బ్రాండ్ అంబాసిడర్ కావడంపై తమకు ఏ విధమైన అభ్యంతరం లేదని ఆయన అన్నారు. సానియా భారత బ్రాండ్ అంబాసిడర్ అని అన్నారు.

బిజెపి నేత మురళీ మనోహర్ జోషీ లక్ష్మణ్ వ్యాఖ్యలపై తీవ్రంగా ప్రతిస్పందించారు. ఎవరైనా ఓ ప్రకటన చేస్తే, అది ఆ వ్యక్తి సంస్కృతిని ప్రతిబింబిస్తుందని అన్నారు.